44° 93' 33'' N ; 4° 89' 21'' E]

23 mars 1574

Monseigneur, hier au soir bien tard je receuz la lettre quil vous a pleu mescripre

et deux heures après jay heu unne allarme bien chaude par le moien

dune femme qui a perdu son sens, qui crioit par les rues appellant

monsieur de Durant, luy demandant aide de ce que les huguenaudz avoient

tué ses enfans, et qui me faizoit croire quilz estoient dans le vilage ;

sestoit que ses voizins alloient après elle pour la faire retirer avec

des chandelles, que le vent avoit tué quon heust jugé que

cestoient des mesches, joinct quelle navoit jamais couru les rues

que ce soir là, que ce maleur luy est advenu pour la perte quelle a faict

de quelques deniers quon luy a desrobbé ; de quoy je vous ay bien voulu

advertir, et vous asseurer, monseigneur, puis quil sagist du

service du roy, de mon honneur et de ma vye, et de toute ma famille

quest avec moy, que je feray si bonne garde que vous en aurés

contantement, et si les ennemis me viennent attacquer, ilz nen

rapporteront que honte. A tant je prieray le Createur vous donner,

monseigneur, en parfecte santé très longue et très heureuze vye. De

Chateaudouble, ce XVIe mars 1574

Votre très humble et très obeissant serviteur

Railhet

Consultation